ભેજયુક્ત વાતાવરણમાં શરદી-ઉધરસ, તાવની સમસ્યા ભગાડવાનો રામબાણ ઈલાજ

ભેજયુક્ત વાતાવરણના કારણે એલર્જીક શરદી, ઉધરસ, તાવ જેવા રોગો તથા શ્વસનતંત્રને લગતી મુશ્કેલીઓ ઉભી થઈ શકે છે. તેની સાથે જ વાત-પિત-કફની પ્રવૃત્તિ વધી જતાં ચામડીના વિવિધ પ્રકારના રોગો ઉત્પન્ન થઈ શકે છે.રોગથી દૂર રહેવા શીખ આપતા તેઓ જણાવે છે કે આ સમયે વ્યક્તિએ પોતાના જઠરાગ્નિનો વિચાર કરી હળવો અને સારી રીતે પચે તેવો ખોરાક લેવો જોઈએ.
જંકફુડ, બહારનો ખોરાક, વાસી ખોરાક આરોગવા જોઈએ નહી.
બને ત્યાં સુધી પાણી ઉકાળીને પીવું જોઈએ.
ચીકણા અને ભારે પદાર્થો જેવા કે દહીં, કેળા, ચીકુ, શીખંડ, મેંદાની વસ્તુઓ, ઈડલી, ઢોકળા, ખમણ લેવા ન જોઈએ.

થોડી પણ પેટની તકલીફ થાય તો જ્યાં સુધી પાચન થઈ ગયું છે તેમ ન લાગે ત્યાં સુધી ભૂખ્યાં રહેવું પણ હિતાવહ હોવાનું જણાવતા ડો.પરમાર કહે છે કે આયુર્વેદમાં 'લંઘનમ પરમ ઔષધમ'ને શ્રેષ્ઠ ગણાવ્યું છે. મતલબ કે ઉપવાસ કરવાથી અડધો રોગ મટી જાય છે. તેમણે આ બધા ઉપાયોથી જઠરાગ્નિ પ્રદિપ્ત થતો હોવાનું અને રોગ પ્રતિકારક શક્તિમાં વધારો થતો હોવાનું જણાવ્યું હતું.

ઉપરાંત આટલી બાબતોનું ધ્યાન રાખો
પેટની તકલીફ વખતે લીંબુ-આદુ-મધ શ્રેષ્ઠ
પેટની તકલીફનો ઉપાય જણાવતા ડો.પરમાર કહે છે કે જ્યારે જ્યારે પેટમાં અજીર્ણ જેવું લાગે ત્યારે ૧૦ ટીપા લીંબુનો રસ, ૧૦ ટીપા આદુનો રસ, ૫ ટીપા મધ મેળવીને જમ્યા પહેલાં ૧૫-૨૦ મિનિટ અગાઉ લેવાથી ખોરાક ખૂબ સારી રીતે પચે છે અને પેટના વ્યાધિ થતાં નથી.
બાળકોના રોગમાં અરડુસી-તુલસી-મધ રામબાણ ઈલાજ
આ ઋતુમાં બાળકોને શરદી, ઉધરસ અને તાવ જેવું લાગે તો અડધાથી એક ચમચી અરડુસી અને તુલસીનો રસ મધ સાથે આપવો. તેમજ બાળકોને સરસવનું તેલ ગરમ કરી છાતી અને વાંસામાં માલીશ કરી, શેક કરવાથી ખૂબ સારો ફાયદો થશે, તેમ ડો.પરમાર જણાવે છે.
પુખ્ત વ્યક્તિને શરદી-તાવમાં રાહત માટે અક્સીર ઉપાય
પુખ્ત વ્યક્તિને એલર્જીક શરદી કે તાવ જેવું લાગે તો અડધી ચમચી સુદર્શન, દસ તુલસીના પાન, બે મરીને ૨૦૦ એમ.એલ. પાણીમાં ઉકાળવા. ૨૦ એમ.એલ. પાણી બાકી રહે ત્યારે તેને નવશેકું સવાર સાંજ પીવાથી લાભ રહે છે. રોજ યોગ્ય માત્રામાં પાણીનું સેવન કરવાથી પાચન ક્રિયા ખુબ જ સારી રહે છે.
ઘરમાં નિયમિત કરો ધૂપ
વાયરલ રોગો થવા કે ફેલાવાની ભીતિ હોય ત્યારે દરેક ઘરમાં રાય, મીઠું, લોબાન, નગોડના પાન, લીમડાના પાન, ગુગળનો સવાર-સાંજ ધૂપ કરવામાં આવે તો ઘરના તમામ લોકોની રોગ પ્રતિકારક શક્તિ વધે છે.