જીવ, તારી જી-હજૂરી જો ટળે, 

શ્વાસ લેવાની પછી ઝંઝટ ન હો.

---ચિનુ મોદી ‘ઈર્શાદ’

આ દર્દ મહોબ્બતનું જે હરગીઝ નથી મટતું, 

ઉપરથી મજા એ કે મને એની દવા યાદ.

--- મરીઝ

તું મને ન શોધ ક્યાંય આસપાસમાં,

હું તને મળી શકું તારા જ શ્વાસમાં.

--- અંકિત ત્રિવેદી

ઈશ્વરને પણ ભુલાવામાં નાંખી શકે છે, 

માણસની જાત દોસ્ત, બડી નામચીન છે.

--- ભગવતીકુમાર શર્મા

પ્રથમ કો’ નયનથી નયનનું મિલન, 

પછી નિત્ય જ્વાળામુખીનું જતન.

--- શૂન્ય પાલનપુરી

આટલે વર્ષે હવે ઈકરાર ના કરશો તમે,

જામ શું કે ઝેર શું, સઘળું સમય પર જોઈએ.

--- મનહરલાલ ચોક્સી

અમે તો સૂઈ લીધું રાત આખી શાંત નિદ્રામાં,

નડી તમને એ વાતો જે તમે રાખી હતી મોઘમ.

--- વિવેક મનહર ટેલર

આંખમાંથી કેટલું ભૂંસવું પડે -

આંખ પંખીની પછી દેખાય છે.

--- નીતિન વડગામા

શોકનો માયો તો મરશે ન તમારો 'ઘાયલ',

હર્ષનો માર્યો મરી જાય તો કહેવાય નહીં !

--- ઘાયલ