વરતારો – સંજુ વાળા
કૈં તો દ્યો વરતારો વાત વાતમાં વળ ચડાવ્યે કેમ આવશે આરો ? તમે નરી મસ્તીમાં અમને ક્યાંય પડે ના ચેન, એવાં તે ક્યાં કારણ જેનાં ઘમ્મર ચડતાં ઘેન, જેવું અમેય ધારી બેઠા, એવું તમેય ધારો ! કૈં તો દ્યો વરતારો હરીફરીને એક જ રટણા સરખી રોજ વિમાસણ, એક નામની આંટી વાળી પાડ્યું જીભે આંટણ. કાં સહુ હા-માં હા કહી દો, કાં સામે પડકારો ! કૈં તો દ્યો વરતારો કોઈ પાતળી એંધાણી કે ચીંધો નક્કર ખૂબી, નહીંતર ભોળી આંખો જાશે ભવાટવિમાં ડૂબી. છેવટ, અમથી હૈયાધારણ દઈને તો પસવારો ! કૈં તો દ્યો વરતારો
- સંજુ વાળા