ગોસિપ કરો, લાંબું જીવો (સતરંગી)
સતરંગી : રશ્મિન શાહ
સાચી વાત તો એ છે કે કોઈની કૂથલી ન કરવી જોઈએ, પણ મોડર્ન સાયન્સ એવું કહે છે કે જો કોઈની પીઠ પાછળ ગોસિપ કરો, કોઈની ગેરહાજરીમાં નિંદા કરો તો હેલ્ધી અને લાંબું આયુષ્ય મળતું હોય છે. આ માટે મોડર્ન સાયન્સ પાસે અઢળક ટેક્નિકલ કારણો છે, પણ એ બધાં ટેક્નિકલ કારણોની પાછળ પડવાને બદલે જો સીધી અને સાદી ભાષામાં એ વાતને સમજાવવામાં આવે તો કહી શકાય કે ગોસિપ કરનારાઓને ક્યારેય કોઈ એન્ટરટેઇનમેન્ટની જરૂર પડતી નથી. સામાન્ય રીતે એન્ટરટેઇનમેન્ટ એટલે કે મનોરંજન લેવાનો પ્રયાસ થતો હોય, પણ કૂથલીબાજોને કોઈની કૂથલી કરવામાં સૌથી વધુ મજા આવતી હોય છે અને એની મજામાં કોઈ અને કોઈ જગ્યાએ બ્લડપ્રેશરમાં ઘટાડો થતો હોય છે. બ્લડપ્રેશરમાં થયેલા ઘટાડાને કારણે સ્ટ્રેસનું લેવલ પણ ઘટતું હોય છે અને સ્ટ્રેસ ઘટવાને કારણેે માનસિક તનાવ પણ ઘટી જતો હોય છે, જેને લીધે હાર્ટ પર દબાણ આવતું નથી અને મન પણ ઉદ્વેગમાં અટવાતું નથી. હાર્ટ અને મન બંને સ્વસ્થ રહેવાથી એના જે કોઈ ફંક્શન છે, એ બરાબર કામ કરે છે. આને લીધી શરીરની બાકીની કાર્યવાહીમાં કોઈ નવી ગડબડ ઊભી થતી નથી. આ ગડબડ ઊભી નહીં થવાને કારણે તંદુરસ્તી જળવાઈ રહે છે. 'ન્યૂ યોર્ક ટાઇમ્સ'માં થયેલા સર્વે મુજબ, દરેક ચોથો અમેરિકન ગોસિપ કરે છે. અમેરિકા ગોસિપની બાબતમાં સૌથી આગળ છે તો માનવામાં નહીં આવે પણ ચીન એટલે કે ચાઇનીઝ લોકોને ગોસિપમાં બિલકુલ રસ નથી. પ્રત્યેક સત્તરમો ચાઇનીઝ ગોસિપ કે કૂથલી કરે છે. આ લિસ્ટમાં ભારતનો નંબર ત્રીજો છે. અમેરિકન સાયન્ટિસ્ટ અને અમેરિકન સર્જન દ્વારા થયેલા સર્વે મુજબ, દરેક સાતમા ભારતીય પાસે ગોસિપ કરવાનો પુષ્કળ સમય છે. પાકિસ્તાન ભલે આપણને ગમે નહીં પણ ગોસિપબાજીની બાબતમાં પાકિસ્તાન આપણાં કરતાં ઘણું સારું છે. ગોસિપની બાબતમાં પાકિસ્તાન ભારત કરતાં સાત નંબર પાછળ છે. દરેક અગિયારમો પાકિસ્તાની કૂથલી કરે છે અને એ કૂથલીમાંથી મનોરંજન મેળવે છે.
પહેલી નજરે મનોરંજક લાગતી કૂથલીઓમાં પણ પ્રકાર હોય છે અને એ પ્રકારનો પણ સર્વે કરવામાં આવ્યો છે. કયા પ્રકારની કૂથલી સૌથી વધારે થતી હોય છે એ જાણતા પહેલાં એ જાણવું જોઈએ કે કૂથલી જેવો સાવ સામાન્ય વિષય હોવા છતાં આ વિષયમાં કેટલા લોકોએ સર્વે કરીને કેટલી કૂથલી થઈ ગઈ છે.
વિશ્વભરમાં ગોસિપ પર દસ હજારથી વધુ સર્વે થયા છે. અલગ અલગ થયેલા આ દસ હજાર સર્વેમાંથી મોટાભાગના સર્વે પશ્ચિમી દેશોમાં થયા છે તો દોઢ હજાર જેટલા સર્વે એશિયામાં અને સાતસો જેટલા સર્વે આપણા દેશમાં પણ થયા છે. કૂથલી કરવા માટે કરવામાં આવેલા ખર્ચનો હિસાબ જો માંડવાનો હોય તો કહી શકાય કે દેશમાં થયેલા આ સર્વેમાં અત્યાર સુધીમાં અંદાજે એકસો કરોડ રૂપિયા ખર્ચી નાખવામાં આવ્યા છે. ખર્ચી નાખવામાં આવેલા આ રૂપિયાની પણ ગોસિપ થઈ શકે એમ છે, પણ એ ગોસિપ કરતા દુનિયાભરના લોકોના ગોસિપના ફેવરિટ વિષયો છે એ જોવું જોઈએ.
ઓફિસ ગોસિપ છે નંબર વન
બોસને ફલાણા સાથે પ્રોબ્લેમ થયો. સિનિયરે જૂનિયરની ઓફિશિયલ કમ્પ્લેઇન કરવાથી લઈને રિસેપ્શનિસ્ટ પેજ ડિઝાઇનર સાથે ચાલુ છે, જેવી અનેક બાબતો ઓફિસમાં ચર્ચાતી હોય છે અને ચર્ચાયેલી આ તમામ વાતોને હવા આપવાનું કામ સ્ટાફ દ્વારા થાય છે. ફલાણો ડિવોર્સ લે છે અને ઢીકણી પણ ડિવોર્સ લેવાની વાત કરે છે. નક્કી કંઈક લફરું લાગે છે. આ લફરું હોય કે નહીં પણ એ લફરાંની વાતો ગોસિપબાજો એટલી મસ્ત રીતે આગળ વધારવાનું કામ કરે છે કે પેલા બંનેને ખબર પણ ન હોય અને એ બંનેનાં મેરેજની તારીખ પણ નક્કી થવા માંડે. ઓફિસ અને ઓફિસના સ્ટાફને લઈને થતી ગોસિપ એ હદે વિસ્તરી ગઈ છે કે દુનિયાભરની ગોસિપમાં એ પહેલા નંબરે છે. સર્વે મુજબ ૩૭ ટકા લોકો ઓફિસમાં ચાલી રહેલી ગોસિપમાં ભાગ લેતા હોય છે અને આ ૩૭ ટકામાંથી ૮ ટકા લોકો ગોસિપ માટે જ ઓફિસમાં આવતા હોય છે અને ગોસિપને હવા આપવાનું કામ કરતા હોય છે. ઓફિસ ગોસિપમાં માત્ર સંબંધો વિશે જ વાત નથી થતી,પગારવધારાના આંકડાઓની ચર્ચાથી લઈને બોસને અને એની વાઇફને આજે ફોન પર ઝઘડો ચાલતો હોય એ સ્તરની પણ વાતો થતી હોય છે. આમ જોઈએ તો આ વિકૃત આનંદ છે, પણ એ આનંદ લેનારા ભારતમાં પણ ઓછા નથી. ભારતમાં ૧૪ ટકા લોકો ઓફિસ ગોસિપ કરે છે. મજાની વાત એ છે કે આ ચૌદ ટકા લોકોમાંથી નવ ટકા મહિલા છે!
ઓટલા પરિષદ નંબર બે
જે કોઈએ એવું ધાર્યું હશે કે ભારતની મહિલાઓ અને ઓટલા પરિષદ કેમ પાછળ રહે એમને હૈયે ધરપત થાય એવી વાત હવે આવે છે. પારિવારિક સ્તરે કે દોસ્તી-યારીમાં થતી ગોસિપ બીજા નંબરે છે. ભારતમાં એ ક્રમ પહેલા નંબરે છે એ તમારી જાણ માટે. પેલીની સાથે પેલાનું ચક્કર ચાલે છે અને પેલો પેલીની બહેનની માટે એના ઘરે ચક્કર મારે છે-થી લઈને નીચેવાળાં સુનીતાબહેનની દીકરી હમણાં રાતે બહુ મોડી આવે છે અને દીપકભાઈનો બીજા નંબરનો જમાઈ તો બે વખત કોઈ બીજાની સાથે જોવા મળ્યો... જેવી ગોસિપ કરવામાં સ્વાભાવિક રીતે એશિયા સૌથી આગળ છે,
એવું ધારતા હોય તો એ હકીકત છે. આ પ્રકારની ગોસિપ અમેરિકા, ઓસ્ટ્રેલિયા, કેનેડા જેવા દેશોમાં થતી નથી પણ હા, બ્રિટનમાં અમુક અંશે થાય છે, પણ અંશ બહુ નાનો છે. જોકે, એ માટે એવી ધારણા રાખવામાં આવે છે કે બ્રિટિશરને આ આદત પણ ઇન્ડિયન કે પછી એશિયને શીખવી હશે. ભારતમાં આ પ્રકારની ગોસિપનું સ્તર એ લેવલ પર હાઈ છે કે તમારી આંખો ફાટી જાય. ૪૮ ટકા. ભારતના સોમાંથી ૪૮ ટકા લોકોને આ પ્રકારની ગોસિપમાં રસ છે અને આ ગોસિપ કરતા ૪૮ ટકામાંથી પણ ૭૨ ટકા મહિલાઓ છે. શહેરનાં બૈરાંઓએ રડવું જોઈએ એવી વાત એ છે કે ગોસિપ કરવામાં ગામડાની મહિલાઓનો ક્રમ સૌથી ઓછો અને પાછળ છે. સિટીલાઇફમાં જીવતી, આખો દિવસ સિરિયલની સામે આંખો ફાડીને બેસી રહેતી અને ઇલેક્ટ્રોનિક ઉપરકણોના કારણે ઘરનાં કામોમાંથી ઝડપથી ફ્રી થઈ જતી શહેરની આ સ્ત્રીઓ પોતાના ફ્રી ટાઇમનો ઉપયોગ ગોસિપ કરવામાં અને કોની દીકરી કોની સાથે ચાલુ છે અને કોનો દીકરો ક્યાં લંગર ફિટ કરી રહ્યો છે, એ ચર્ચામાંથી નવરી નથી પડતી. જો એવું ધારતા હો કે મેટ્રો કે ર્વિંકગ વુમન આ કામ નહીં કરતી હોય તો એના માટે એટલું જ કહેવાનું કે એ પણ આ કરે છે. ફરક માત્ર એ હોય છે કે એની ઓટલા પરિષદ નહીં પણ એની ઓફિસ પરિષદ હોય છે.
સેલિબ્રિટી કોર્નર ત્રણ
માનવામાં નહીં આવે પણ ગોસિપ કરવામાં ત્રીજા નંબરે આ સેલિબ્રિટી છે. ખબર પડી અભિષેક બચ્ચનની દીકરી ડિટ્ટો સલમાન જેવી દેખાય છે અને ઇમરાન હાશ્મીને એના મામા મહેશ ભટ્ટે બે ફિલ્મમાંથી કાઢી મૂક્યો. આવા જે કોઈ ન્યૂઝ કે અફવા સાંભળવા મળતી હોય છે બધી સેલિબ્રિટી દ્વારા જ ફેલાવવામાં આવેલી ગોસિપ છે. અ નામના એક્ટરને બ નામની નવી બેબી સાથે બહુ બને છે એ વાત ફેલાવીને સ્ટાર્સ મજા લે છે તો બીજા ફિલ્ડના પણ એ જ રીતે મજા લઈ લેતા હોય છે. આ મજા ગોસિપ હોય છે પણ એ પછી કોઈ અને કોઈ ન્યૂઝપેપરમાં ન્યૂઝ બનીને ચમકે છે અને હકીકતમાં કોઈની પણ બેન્ડ મારવાનું શરૂ કરી દે છે.
બોક્સઃ
ગોસિપ કોણ નથી કરતું?
ગોસિપ નહીં કરવાની બાબતમાં આમ તો પુરુષો મહિલાઓ કરતાં અનેક ગણા આગળ છે, પણ હકીકત એ પણ છે કે જેની લાઇફ શુષ્ક હોય અને જેને મજા નામના શબ્દ સાથે ઓછો પનારો હોય છે, નીરસ રીતે જીવતા હોય છે કે પછી નાનો સરખો પણ આનંદ લેવાની ક્ષમતા નથી હોતી એ લોકો ગોસિપથી દૂર રહેતા હોય છે. ભારતમાં થયેલા એક સર્વે મુજબ ધર્મ ધુરંધર પણ ક્યારેક ગોસિપ કરી લેતા હોય છે પણ હા, એટલું ચોક્કસ છે કે એ ગોસિપમાં કોઈની આબરૂ ખરડાતી નથી હોતી.
No comments:
Post a Comment