હજી થોડાક એવા મિત્ર છે

ગમે ત્યાં ને ગમે ત્યારે ફસાવી દે, હજી થોડાક એવા મિત્ર છે,
ઉદાસી ફૂંક મારીને ઉડાવે દે, હજી થોડાક એવા મિત્ર છે.

મને પૂછ્યા વગર લઇ જાય બાઈક મારી ને આખો દિવસ એ ફેરવે,
ખૂટે પેટ્રોલ ત્યારે માંડ ચાવી દે, હજી થોડાક એવા મિત્ર છે.

પ્રથમ તો ફોસલાવી મને એ મારી અંગત વાત જાણે, ને પછી?
પછી આખી દુનિયા ને જણાવી દે, હજી થોડાક એવા મિત્ર છે.

કદી મારા ઘરે મેહમાન થઇ આવે પછી હું મુકવા જઉં અને,
મને ખુદ ને એ બસમાં ચડાવી દે, હજી થોડાક એવા મિત્ર છે.

કરે હેરાન હરપળ એટલું કે આંખમાં આંસુ જ આવી જાય પણ,
રડું તો આંખોને ઝાકળ બનાવી દે, હજી થોડાક એવા મિત્ર છે.

- અનિલ ચાવડા